Bagdad skal få undergrunn

Trafikkork har ikkje vore det verste innbyggjarane i Bagdad har stått overfor sidan invasjonen i 2003. Daglege drap ved vegsperringane har gjort pendling til eit sjansespel med døden som innsats.

Men den siste tida har talet på drap og terrorhandlingar gått dramatisk ned.

Det har ført til at styresmaktene har børsta støvet av gamle teikningar av ein undergrunn som Saddam Hussein planla på 1970-talet.

Deler Bagdad

Dei siste åra har trafikksituasjonen i byen blitt prekær. Då sanksjonane fall bort etter invasjonen, auka talet på bilar i byen kraftig.

Samstundes dukka det opp hundrevis av vegsperringar som var meint til å dempe den sekteriske valden i byen.

Det har ført til eit stort behov for eit kollektivtilbod.

Undergrunnen er no sendt ut på anbud til internasjonale selskap. Kostnaden er rekna til å liggje på rundt 21 milliarder kroner, melder nyhetsbyrået AFP.

Etter planen skal byen få to metroliner. Ein vil få 20 stasjonar, og banen vil gå frå sjiaområdet Sadr-byen i aust, innom sentrum og så vidare oppover.

Den andre lina skal gå frå sør, over Tigris-elva og til dei sunni-muslimske bydelane i vest-Bagdad.

- Bystyret har teikningar og design for prosjektet, men dei er gamle. Så vi ynskjer å oppdatere detaljane i samarbeid med internasjonale selskap, seier talsperson Hakim Abdelzahra til AFP.

Dårleg infrastruktur

Det er framleis mykje som skal til for at infrastrukturen i Bagdad fungerer. Byen har eit svært dårleg kloakksystem og straumen går fleire gonger for dagen.

Likevel er situasjonen betra markant det siste året. Innbyggjarane i byen er likevel skeptiske.

- Dersom nokon hadde foreslått eit tog for eit år sidan, ville dei har blitt sendt til ein av Saddam sine gamle mentalsjukehus og aldri høyrt frå igjen, seier Umm Fatimah, 41, til australske The Age.

- Sjølv no verkar det som litt galskap, seier ho.